Diwrnod Rhyngwladol y Teuluoedd 2026: Sut mae Linc Cymunedol Môn yn cefnogi teuluoedd – stori Karen ac Ela

Mae teuluoedd yn dod mewn amrywiaeth o siapiau a ffurfiau, pob un â’i gryfderau, ei heriau a’i anghenion unigryw ei hun. Ar Ddiwrnod Rhyngwladol y Teuluoedd 2026, rydym yn dathlu pwysigrwydd cefnogaeth gymunedol wrth helpu teuluoedd i ffynnu yn eu holl amrywiaeth.

Mae stori Karen yn amlygu sut y gall cefnogaeth ymarferol, wedi’i theilwra gan Linc Cymunedol Môn wneud gwahaniaeth ystyrlon i fywyd teuluol bob dydd.

Mae Karen sy'n riant sengl, wedi’i chyfeirio’n wreiddiol at Linc Cymunedol Môn am gymorth gyda chludiant i’r ysbyty ar gyfer ei merch, Ela (9), sydd ag awtistiaeth, anabledd dysgu, a chyflwr iechyd. Ar y pryd, roedd y teulu’n wynebu pwysau ariannol, ac roedd Ela yn ei chael yn anodd delio â newidiadau yn y drefn ddyddiol, gan fod angen cymorth ychwanegol arni yn aml i deimlo’n gyfforddus.

Trwy Linc Cymunedol Môn, cafodd y teulu ystod o gymorth ymarferol a chymunedol. Roedd hyn yn cynnwys pedair taith cludiant i’r ysbyty, cyfeiriad bwyd heb lactos gan Bwyd Da Môn, a talebau Asda a thanwydd i leddfu’r pwysau ariannol. Cafodd Karen hefyd ei chyfeirio at Dîm Cynhwysiant y Cyngor am arweiniad a chyngor ariannol.

Er mwyn cefnogi lles a threfn ddyddiol Ela ymhellach, cafodd dablet (gyda chas porffor) a mynediad i Alexa drwy’r rhaglen Technoleg Mewn Gofal, gan ei helpu i aros yn ymgysylltiedig, yn fodlon ac yn chwilfrydig mewn ffyrdd sy'n gyfarwydd iddi. Fe gafodd y teulu hefyd ddillad ysgol am ddim drwy’r Banc Dillad a mynediad at weithgareddau haf am ddim, gan gynnwys diwrnod allan hwyliog.

Mae’r effaith wedi bod yn sylweddol. Mae Karen bellach yn cael mwy o gefnogaeth, yn fwy hyderus wrth ofyn am help, ac yn llai ynysig wrth ymdopi â phwysau bywyd teuluol. Mae Ela yn hapusach, yn fwy ymgysylltiedig, ac yn mwynhau ei thablet ac Alexa, gyda phrofiadau haf positif wedi rhoi hwb i’w hyder a’i mwynhad.

Mae’r stori yma yn adlewyrchu sut mae Linc Cymunedol Môn yn helpu i gryfhau teuluoedd drwy gynnig cymorth ymarferol, lleihau pwysau bob dydd, a sicrhau bod teuluoedd yn eu holl wahanol ffurfiau yn teimlo’n gynhwysol, yn cael eu gwerthfawrogi, ac yn cael eu cefnogi yn eu cymuned.

Am fwy o wybodaeth am Linc Cymunedol Môn cliciwch yma